د افغانستان اسلامي امارت د عامې روغتیا وزیر، ښاعلي ډاکټر قلندر عباد په خپل کاري دفتر کې د اسلامي هېوادونو سازمان د پروژو له مسؤل، ښاغلي خلیل ابراهیم سره لیدنه ترسره کړه
په دې لیدنه کې د روغتیايي مرکزونو په جوړولو، د مور او ماشوم روغتیا ته پر ځانګړې پاملرنې، د افغان روغتیايي پرسونل ظرفیت لوړولو او ورته نورو موضوعاتو په اړه بحث او خبرې ترسره شوې.
د عامې روغتیا وزیر، ښاغلي ډاکټر قلندر عباد د هېواد په لرې پرتو سېمو کې د روغتیايي مرکزونو د جوړولو تر څنګ، د افغان روغتیايي پرسونل ظرفیت لوړول او د مور او ماشوم روغتیا ته ځانګړې پاملرنه له خپلو لومړیتوبونو څخه وبلل او ویې ویل، موږ هڅه کوو؛ تر څو ټولو هېوادوالو ته په کور دننه په ټولو روغتیايي برخو کې خدمتونه وړاندې کړو.
له بل لوري د اسلامي هېوادونو سازمان د پروژو مسؤل، ښاغلي خلیل ابراهیم د دې سازمان د همکاریو پر دوام ټینګار وکړ او ویې ویل، چې موږ به په نېږدې راتلونکي کې د عامې روغتیا وزارت له مشرتابه سره د روغتیايي مرکزونو د جوړېدو او نورو روغتیايي برخو کې د مرستې په موخه خپل وړاندیزونه شریک کړو.
