د عامې روغتیا وزیر په خصوصي سکتور کې د غوره روغتیایي خدماتو وړاندې کولو په موخه له مرستیالانو او رئیسانو سره ناسته تر سره کړه
د افغانستان اسلامي امارت د عامې روغتیا وزیر ښاغلي مولوي نور جلال جلالي په خصوصي سکتور کې د وړاندې کیدونکو روغتیايي خدماتو څخه د نظارت ، روغتیايي لګښتونو د کنټرول ، د غیر قانوني روغتیايي مراکزو د قانون ته برابرولو ، د روغتیايي مراکزو د درجه بندۍ او اعتبار ورکولو پروسې نهایي کولو ، د غیر معیاري او بې اساسه لوحو اصلاح او په ټوله کې د ولس ستونزو ته د رسیدنې په موخه د عامې روغتیا وزارت له مرستیالانو او رئیسانو سره ناسته تر سره کړه.
په دې ناسته کې چې د عامې روغتیا وزارت د مالي او اداري چارو مرستیال، د روغتیايي خدماتو وړاندې کولو مرستیال ، د روغتیا د پراختیا او پالیسۍ مرستیال ، د خصوصي سکتور د همغږۍ ریاست استازو ، د روغتیایي قوانینو د تطبیق څخه د څارنې ریاست استازو او نورو بیلا بیلو مسؤولینو شتون درلود د عامې روغتیا د وزیر ښاغلي جلالي له لوري د ولس ستونزو ته د رسیدنې په موخه د عاجل اقدام سپارښتنې تر سره شوې چې په تعقیب به یې د یو ګډ کمیسون په مرسته په مرکز او ولایاتو کې د روغتیایي خدماتو څخه د نظارت هڅې لا ګړندۍ او زیاتیږي تر څو خدمات معیاري او د غیر قانوني کړنو مخنیوی تر سره شي.
