د امربالمعروف، نهي عن المنکر او شکایتونو اورېدلو وزارت له لورې د عامې روغتیا وزارت کارکوونکو ته اصلاحي وینا تر سره کړه
د افغانستان اسلامي امارت د امربالمعروف، نهي عن المنکر او شکایتونو اورېدلو وزارت د نظارت رئیس، ښاغلي مولوي فضل الربي فضلي د یوې غونډې په ترڅ کې د عامې روغتیا وزارت رئیسانو او کارکوونکو ته د اسلامي اصولو په رڼا کې د یاد وزارت د قوانینو پلي کولو په موخه اصلاحي وینا ترسره کړه
په دې لیدنه کې د عامې روغتیا وزارت د مقام د دفتر رئیس، ښاغلي شیخ الحدیث مولوي محمد طاهر حلیم، د ارشاد او دعوت رئیس ښاغلي شیخ محمد قسم حقاني، د وزارت یو شمېر نورو رئیسانو او کارکوونکو شتون درلود.
د امربالمعروف، نهي عن المنکر او شکایتونو اورېدلو وزارت د نظارت رئیس، مولوي فضل الربي فضلي وویل:( د امرباالمعروف او نهي عن المنکر قوانینو پلي کولو موخه د ټولنې اصلاح کول دي او موږ د عامې روغتیا وزارت له ټولو مسؤلینو او کارکوونکو غواړو؛ څو په دې برخه کې زموږ سره همکاري وکړي.
نوموړي همداراز د عامې روغتیا وزارت له ټولو مسؤلینو او کارکوونکو وغوښتل، چې خپله ظاهري بڼه او سیرت د امربالمعروف او نهي عن المنکر وزارت د قوانینو له مخې برابر او یاد قانون په اړوندو ادارو کې پلي کړي.
له بل لوري د عامې روغتیا وزارت د مقام د دفتر رئیس، شیخ الحدیث مولوي محمد طاهر حلیم او د ارشاد او دعوت رئیس شیخ محمد قاسم حقاني هم ګډونوالو ته د امربالمعروف او نهي عن المنکر د قوانینو پلي کولو اړوند خبرې ترسره کړې او په دې برخه کې یې د امربالمعروف، نهي عن المنکر او شکایتونو اورېدلو وزارت مسؤلینو ته د همکارۍ ډاډ ورکړ.
