د عامې روغتیا وزیر، ښاغلي مولوي نور جلال جلالي چین هېواد ته د خپل رسمي سفر په لړ کې د سنتي طب نړیوال کنفرانس کې ګډونوالو ته خپله وینا ترسره کړه
په دې کنفرانس کې چې موخه یې د سنتي طب برخه کې د تجربو او لاسته راوړنو شریکول و، د بېلا بېلو هېوادونو د روغتیا وزیرانو، مرستیالانو، څېړونکو او د یو شمېر مؤسسو استازو ګډون درلود.
د عامې روغتیا وزیر، ښاغلي مولوي نور جلال جلالي په سیمه کې د سنتي طب په برخه کې د روغتیا نړیوال او شنګهای د همکاریو سازمانونو همکاري اړینه وبلله او ویې ویل: "په افغانستان کې باید د سنتي طب برخه معیاري او د عصري طبابت برخه وګرځي او د دې برخې علاقمندانو ته معیاري تدریسي کریکولم جوړ شي".
د عامې روغتیا وزیر دغه راز د سنتي طبابت برخه کې د چین او افغانستان تر منځ په دوه اړخیزه همکارۍ ټینګار وکړ؛ ترڅو د ظرفیت جوړونې، تجاربو شریکولو او په دې برخه کې د شریکو څېړنو زمینه برابره شي.
د یادونې وړ ده، چې اوسمهال د عامې روغتیا وزارت په تشکیل کې د سنتي طب څانګه جوړه شوې چې د دې برخې طبیبانو د کارونو د اصلاح او ښه والي په موخه د پالیسیو او لارښودونو په جوړولو کار کوي.
