هلمند کې پر نشه یي توکو د روږدو ښځو او ماشومانو د درملنې شل بستریز روغتون پرانیستل شو
په همدې موخه جوړو شویو مراسمو کې د هلمند د عامې روغتیا رئیس الحاج مولوي احمد شفیع الله، د تطبیق کوونکو مؤسسو استازو، روغتیا پالانو او د بېلا بېلو ادارو مسؤلینو ګډون کړی و.
د هلمند د عامې روغتیا رئیس د خپلې وینا پر مهال وویل، یاد روغتون د عامې روغتیا وزارت له لوري منظور شوی، شل بستره لري او په وړیا توګه به په کې د روږدو ښځو او ماشومانو درملنه کېږي.
نوموړي دغه راز، د همکارو مؤسسو له مسؤلینو وغوښتل چې د روږدو لپاره د درملو برابرولو، عامه پوهاوي او حرفوي زده کړو برخه کې دې خپل مسؤلیت په سمه توګه ترسره او دې برخې ته دې لا زیاته پاملرنه وکړي.
