د ا.ا.ا. د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني او مل تخنیکي ټیم پروان ولایت ته د روغتیايي خدمتونو ارزونې په موخه سفر ترسره کړ
د دې سفر په ترڅ کې د روغتیايي خدمتونو وړاندې کولو مرستیال، د پروان د عامې روغتیا له رئیس، مولوي داد الله امداد سره ناسته وکړه، د سفر موخه یې ورسره شریکه او په عامه روغتیايي خدماتو یې بحث او خبرې ترسره کړې.
دغه راز، مل تخنیکي ټیم د روغتیايي خدمتونو وړاندې کولو مرستیال، په لارښوونه د پروان ولایتي روغتون څخه ليدنه وکړه، شته نیمګړتیاوې یې په نښه او د حل په موخه یې د یاد روغتون له مسؤلینو سره شریکې کړې.
ښاغلي مرستیال همداراز، د تخنیکي ټیم له لوري په نښه شوې ستونزې او نیمګړتیاوې د پروان د عامې روغتیا له رئیس سره شریکې او د حل سپارښتنه یې وکړه؛ ترڅو د پروان اوسېدونکو ته غوره روغتیايي خدمات وړاندې او ستونزو ته یې پر وخت رسېدنه وشي.
