د عامې روغتیا وزیر ښاغلي مولوي نور جلال جلالي له هرات ولایت روغتیایي چارواکو او نړیوالو همکارانو سره ګډه ناسته ترسره کړه
د ا.ا.ا د عامې روغتیا وزیر، ښاغلي مولوي نور جلال جلالي هرات ولایت ته د سفر په ترڅ کې د هرات ولایت د عامې روغتیا له رئیس، روغتیایي کارکوونکو، د نړیوالو ادارو له استازو او تطبیق کوونکې مؤسسې له مسؤلینو سره ګډه ناسته ترسره کړه
په دې ناسته کې د هرات ولایت د عامې روغتیا رئیس مولوي محمد طالب شاهد، د یاد ریاست مرستیال ډاکټر حنیفي او د نړیوالو اداراو استازو خپلې ویناوې واورولې او د هرات عامې روغتیا مرستیال د دې ولایت د روغتیایي خدماتو اړوند مفصل معلومات وړاندې کړل.
د عامې روغتیا وزیر، د خپلو خبرو په ترڅ کې روغتیایي کارکوونکو ته د روغتیایي خدماتو د کیفیت ښه والي اړوند لازمې سپارښتنې ترسره او له هغوی یې وغوښتل، چې ناروغانو سره د ښه چلند سربېره د هغوی روغتیايي ستونزو ته بشپړه رسېدنه وکړي.
ښاغلي وزیر همداراز، د خپلې وینا په ترڅ کې د تطبیق کوونکې مؤسسې او نړیوالو ادارو له استازو د شفافیت او اړتیا پر مهال روغتیا سکټور سره د همکارۍ اړوند خبرې شریکې کړې.
د غونډې په پای کې د هرات ولایت روغتیایي مسؤلینو او د نړیوالو روغتیایي ادارو استازو د خپلې ژمنتیا څرګندونې ترڅنګ شریکو شویو سپارښتنو ته د بشپړې پاملرنې ډاډ ورکړ.
