د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د اداري اصلاحاتو او ملکي خدمتونو ادارې، د ملکي خدمتونو د ګمارنې او اسانتیاوو برابرولو له رئیس، مولوي محمد حنان حقاني سره لیدنه تر سره کړه
په دې لیدنه کې چې د عامې روغتیا وزارت د مقام د دفتر لوی رئیس، الحاج شیخ محمد طاهر حلیم او د کارکوونکو چارو لوی ریاست مشاورینو هم شتون درلود، د روغتیا وزارت مسلکي خالي بستونو لپاره د ازادې سیالۍ له لارې د ازموینې اخیستلو، د ازموینې له لارې بریالیو کسانو ته د مسلکي بستونو سپارلو او د ګمارنې برخه کې د شفافیت رامنځته کولو اړوند بحث او خبرې تر سره شوې.
د عامې روغتیا وزیر، ښاغلي مولوي نور جلال جلالي د روغتیا وزارت د مسلکي خالي بستونو لپاره د ازموینو اخیستلو برخه کې د اداري اصلاحاتو او ملکي خدمتونو ادارې له همېشنۍ همکارۍ مننه وکړه او د ۱۴۰۴ لمریز کال لپاره د عامې روغتیا وزارت مسلکي بستونو د ازموینو اخیستلو او شفافیت برخه کې یې د یادې ادارې څخه د همکارۍ غوښتنه وکړه.
دغه راز، د اداري اصلاحاتو او ملکي خدمتونو ادارې، د ملکي خدمتونو د ګمارنې او اسانتیاوو برابرولو رئیس، د ازموینو اخیستلو او شفافیت برخه کې د ادارې اصلاحاتو او ملکي خدمتونو اداره یوه باوري اداره وبلله او د شفافیت برخه کې یې د بشپړې همکارۍ ډاډ څرګند کړ.
