د عامې روغتیا وزارت د همغږۍ غونډه د تطبیق کوونکو مؤسسو له مسؤلینو سره په هلمند کې ترسره شوه
د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت او مل تخنیکي ټیم هلمند ته د سفر پر مهال د تطبیق کوونکو مؤسسو له مسؤولینو سره د همغږۍ غونډه ترسره کړه
په یاده غونډه کې چې د عامې روغتیا وزارت د څارنې او پلټنې لوی رئیس ډاکټر عنایت الله عنایت، د هلمند د عامې روغتیا رئیس مولوي فضلي احمد شفیع الله هم ګډون درلود، د مالي او اداري چارو مرستیال پر لا زیاتې همغږۍ ټینګار وکړ او د تطبیق کوونکو مؤسسو مسؤلینو ته وویل: ( چې خپلې دندې په صداقت او ایماندارۍ مخته یوسئ، د ځان خیر د ټولنې په خیر کې ولټوئ، امکانات سم وکاروئ او د هېواد د پرمختګ او هوساینې لپاره خپلې هڅې لا زیاتې کړئ؛ تر څو هېواد مو له نړۍ سره سیال شي.)
دغه راز، د عامې روغتیا وزارت د څارنې او پلټنې لوی رئیس ډاکټر عنایت الله عنایت د مؤسسو مسؤلینو ته د درملو انتقالاتو، خالي بستونو د ازموینو اخیستلو پر شفافې پروسې او د عامې روغتیا ریاست سره د پرپوزل په شریکولو ټینګار وکړ.
