د عامې روغتیا وزارت په ابنسینا صدري ملي او تخصصي روغتون کې د ۱۰۰ کیلو واټه لمریزې برېښنا سیسټم د پرانیستې مراسم ترسره شول
د لمریزې برېښنا یاد سیسټم د عامې روغتیا وزارت په همغږۍ او د ملګرو ملتونو د پراختیایي ادارې (UNDP) په مالي او تخنیکي ملاتړ جوړ شوی، چې ټولیز لګښت یې ۱۵۰ زره امریکایي ډالر کېږي.
په همدې موخه جوړو شویو مراسمو کې د عامې روغتیا وزارت یو شمېر مرکزي رئیسانو، د UNDP سازمان سیمه ییز مشر ښاغلي سټیفن روډریګرز او مل پلاوي، د ابن سینا روغتون مسؤلینو او روغتیايي کارکوونکو ګډون کړی و.
په دې غونډه کې د ابن سینا صدري روغتون رئیس، ډاکټر فریدون رحماني ګډونوالو ته د روغتون د خدماتو په اړه هر اړخیز معلومات وړاندې او زیاته یې کړه، چې د لمریزې انرژۍ سیسټم نصب به د یاد روغتون د خدماتو لا ښه والي برخه کې اغېزمن رول ولري.
