د عامې روغتیا وزارت خبرتیا!
د کونړ ولایت د نورګل او څوکۍ ولسوالیو د وروستۍ زلزلې له امله زموږ ګڼ شمېر هېوادوال شهیدان شوي او زیات شمېر نور ټپیان دي، د دې ناورین د متضررو شویو کسانو د ملاتړ او د هغوی د ژوند د ژغورنې لپاره اړینه ده، چې په اغېزمن ډول روغتیايي خدمتونه او ضروري اسانتیاوې برابرې شي او له موجودو سرچینو څخه په مؤثره توګه ګټه واخیستل شي.
په همدې موخه د کونړ د عامې روغتیا ریاست په ولایتي او د ولسوالیو په کچه ځانګړې کمېټې ګمارلي دي، تر څو د همغږۍ او خدمتونو د سم مدیریت چارې پرمخ یوسي.
له ټولو ملي او نړیوالو ادارو، ملي او نړیوالو غیر دولتي سازمانونو (انجوګانو) او د خصوصي روغتیايي سکټور له همکارانو څخه په درنښت غوښتنه کېږي، چې که غواړي د زلزله ځپلو لپاره د روغتیايي خدمتونو او نورو اړینو اسانتیاوو برابرولو کې مرسته وکړي، نو لومړی دې د کونړ د عامې روغتیا ریاست اړوندو کمېټو سره اړیکه ونیسي؛ تر څو هغه سیمې په ورته په نښه شي چې د خدمتونو وړاندې کولو ډېره اړتیا په کې لیدل کېږي.
