د عامې روغتیا وزارت د ولایتونو همغږۍ رئیس د شمالي ولایتونو له مسؤلینو سره آنلاین ناسته وکړه
د عامې روغتیا وزارت د ولایتونو همغږۍ رئیس، ډاکټر فضل الهي علیزي د کندز، تخار، سرپل، جوزجان، سمنګان، بلخ، فاریاب، بدخشان او بغلان ولایتونو د عامې روغتیا مسؤلینو سره آنلاین لیدنه تر سره کړه.
د دې لیدنې موخه د ولایتي ریاستونو او په مرکز کې د ولایتونو د همغږۍ ریاست ترمنځ د لا زیاتې همغږۍ رامنځته کول، د شته ننګونو بیاکتنه او په ولایتي کچه د روغتیایي پروګرامونو پلي کولو د ښه والي لپاره د اړینو تدابیرو نیول وو.
په دې ناسته کې تدارکاتي پروسو کې د ځنډ، د فاضلابو د تصفیې لپاره د یو غیر متمرکز سیسټم رامنځته کولو په اړتیا، د معاشاتو د پالیسۍ ارزونې او بیاکتنې، ولایتونو کې د درملتونونو او عمده درمل پلورنځیو د بیا ځلې ثبت، د غیر فعال روغتیایي مرکزونو د لیست ترتیبولو او په روغتیایي مرکزونو کې د برېښنا مصرف د اروزنې اړوند بحث او خبرې تر سره شوې.
د عامې روغتیا ولایتي مسؤلینو د همکارۍ په پیاوړتیا او د اړوندو ادارو ترمنځ د همغږۍ په زیاتوالي ټینګار وکړ، چې دا چاره به د روغتیايي خدمتونو په ښه والي او د ستونزو ژر حل کې زیاته مرسته وکړې.
د دې ناستې پای کې ډاکټر فضل الهي عليزي د موجوده ننګونو حل لپاره د ولایتونو ترمنځ د لا زیاتې همکارۍ غوښتنه وکړه.
