د لغمان ولایتي روغتون څخه نظارت تر سره شو
د ا.ا.ا د عامې روغتیا وزارت د روغتیایي پراختیا او پالیسۍ مرستیال ښاغلي ډاکټر محمد حسن غیاثي، د طبي شورا لوی رئیس ډاکټر فقیر محمد زیار او مل پلاوي لغمان ولایت ته د خپل سفر په ترڅ کې د مهترلام ولایتي روغتون څخه نظارت تر سره کړ
د دې نظارت موخه د روغتیايي خدماتو د کیفیت ارزونه، د ناروغانو احوال اخیستل، د کارکوونکو له چارو څخه لیدنه او د دې روغتون د موجوده ستونزو او اړتیاوو په نښه کول وو.
د روغتیايي پراختیا او پالیسۍ مرستیال، ښاغلي ډاکټر محمد حسن غیاثي د ولایتي روغتون د مسلکي ټیم د هڅو ستاینې ترڅنګ ژمنه وکړه، چې د عامې روغتیا وزارت به د دې روغتون د لا ښه والي لپاره د اسانتیاوو او تخنیکي ملاتړ زمینه برابره کړي.
دغه راز، د لغمان د عامې روغتیا رئیس، ډاکټر سمیع الله عابد نیازي د عامې روغتیا وزارت له رهبرۍ څخه د دې نظارت او پاملرنې په موخه مننه وکړه او ډاډ یې ورکړ، چې ور سره شریک شوي وړاندیزونه به ډېر ژر عملي کړي؛ تر څو د لغمان خلکو ته غوره او با کیفیته روغتیایي خدمات وړاندې شي.
