د الشفاء ملي او تخصصي روغتون د ترمیم چارو د چټکتیا او ستونزو د حل په اړه ګډه ناسته ترسره شوه

د عامې روغتیا وزارت د روغتیایي خدماتو وړاندې کولو مرستیال، ښاغلي مولوي عبدالولي حقاني د الشفاء ملي او تخصصي روغتون د ترمیم چارو چټکتیا او ستونزو حل په موخه د تدارکاتو، ساختماني، معالجوي طب ، مالي ریاست مسؤلینو، د ملي انکشاف شرکت او ښار جوړونې وزارت استازو سره ناسته ترسره کړه

په دې ناسته کې چې د الشفاء ملي او تخصصي روغتون د ترمیم چارو د چټکتیا، شته ستونزو د حل او د خنډونو له منځه وړلو په اړه بحث او خبرې ترسره شوې، د روغتیایي خدماتو وړاندې کولو مرستیال وویل، د الشفاء روغتون د ترمیم چارو ترسراوي پر وړاندې چې کوم خنډونه موجود دي، باید ژر تر ژر له منځه ویوړل شي او چارې دې په پوره چټکتیا، شفافیت او ښه کیفیت ترسره شي؛ ترڅو د خلکو باور تر لاسه او له خدماتو څخه ډاډمن شي.

په یاده ناسته کې اړوندو مسؤلینو د خپلو فعالیتونو او د ترمیم پروسې د پرمختګ په اړه معلومات وړاندې کړل او زیاته یې کړه، د الشفاء ملي او تخصصي روغتون د ترمیم چارې به په لوړ کیفیت او لازم سرعت سره بشپړې کړي.