د عامې روغتيا وزارت له لوري په عاجل ابن سینا روغتون کې د آنلاین ډيټابیس سیسټم پرانيسته تر سره شوه
په همدې موخه جوړه شوې غونډه کې د عامې روغتیا وزارت د مقام د دفتر لوی رئیس شيخ محمد طاهر حليم، د اکمال تخصص لوی رئيس دوکتور نثار احمد نيازي، د وزارت يو شمېر مرکزي رئیسانو، د تخصصي او ثالثي روغتونونو مسؤلينو، متخصصینو او روغتيايي کارکوونکو ګډون کړی.
د اکمال تخصص لوی رئیس، دوکتور نثار احمد نیازي ياد سیستم روغتيا برخه کې یوه ستره لاسته راوړنه وګڼله او دا سیستم يې د دقيقو روغتيايي معلوماتو په ثبت، د ټريني ډاکټرانو لپاره د روزنيز انلاين چوکاټ رامنځته کولو، د تخصصي زده کړو د کيفيت په ښه والي او شفافیت، د نظارتي بهیر اسانتيا، له نړيوالو معيارونو سره د روزنيزو پروګرامونو برابرولو، علمي معلوماتو ته د اسانه لاسرسي او د روغتيايي خدمتونو د کيفيت لوړولو کې خورا مهم او اساسي اقدام وباله.
همداراز، د مقام د دفتر لوی رئیس، الحاج شيخ محمد طاهر حليم هم ياد ډيټابیس سیسټم د روغتيايي معلوماتو دقیق ثبت او د وخت غوره مدیریت برخه کې ستره لاسته راوړنه وبلله او د دغه سیسټم په غوره مدیریت یې ټينګار وکړ.
په دې غونډه کې همداراز، د عاجل ابن سینا ملي او تخصصي روغتون رئیس دوکتور ګلاب ګل ځدران، د ياد روغتون د ټريننګ برخې مسؤل دوکتور محمد عظیم صمیم او د اکمال تخصص رياست د ډيټابیس امر انجینر فرهاد وفا د دغه انلاين سیسټم د ګټو او موخو په اړه ګډونوالو ته هر اړخیز معلومات ورکړل.
د یادونې وړ ده چې د عامې روغتیا وزارت په دا وروستیو کې په بیلا بیلو برخو کې ډیجیټلي سیستمونو را منځته کولو باندې کار پیل کړی چې نسبت وړاندې ته په چارو کې اسانتیاوې را منځته شوې دي.
