د عامې روغتیا وزارت د خوړو او درملو معینیت کې لومړي ځل لپاره د سنتي طب د درسي نصاب جوړولو او بشپړولو غونډه تر سره شوه
په همدې موخه جوړو شويو مراسمو کې د عامې روغتیا وزیر ښاغلي مولوي نور جلال جلالي، د خوړو او درملو مرستیال ښاغلي مولوي حمد الله زاهد، د روغتیا وزارت مرکزي رئیسانو، ګڼ شمېر حکیمانو او یو شمېر نورو مسؤلینو ګډون کړی و.
د عامې روغتیا وزیر، ښاغلي مولوي نور جلال جلالي د سنتي طب لپاره د یو معیاري نصاب په جوړېدو خوښي څرګنده او د نوموړي نصاب څخه یې د ښې استفادې غوښتنه وکړه.
ښاغلي وزیر وویل:( په ډیری نږدې هېوادونو کې سنتي طب شته، خو په افغانستان کې ډېر کمرنګه وه؛ زما امید همدا و، چې سنتي طب معیاري شي، نو په همدې اساس له هغو کسانو مننه کوم چې په ډېر لنډ وخت کې یې له ګڼو سرچینو څخه په ګټې اخیستنې سنتي طب ته معیاري نصاب جوړ کړ، چې په مرسته به یې دغه برخه لا پیاوړې شي).
په یادو مراسمو کې د عامې روغتیا وزارت د خوړو او درملو مرستیال، مولوي حمد الله زاهد سنتي طب د افغانستان د علمي او کلتوري میراث یو مهمه برخه یاده کړه او دې برخې ته یې د نصاب جوړول یو ارزښتمن ګام وباله.
ښاغلي مرستیال دغه راز زیاته کړه، چې دا نصاب لومړی د عامې روغتیا وزارت اړوند انسټېټیونو کې شامل او په بېلا بېلو پړاوونو کې به د هېواد ټولو حکمیانو ته د ورکشاپونو له لارې تشریح شي.
ښاغلي حمد الله زاهد ډاډ څرګند کړ، چې د شته امکاناتو څخه په لازمې ګټې اخیستنې به د سنتي طب معیاري کېدو په موخه لا زیاتې اسانتیاوې رامنځته کړي؛ تر څو د خلکو د مناسبې استفادې لامل شي.
