د عامې روغتیا وزارت د خوړو او درملو مرستیال، ښاغلي مولوي حمدالله زاهد او د دغه معینیت تخنیکي ټیم هېواد کې د GMP تصدیق پاڼو لرونکو د درملو سترو تولیدي فابریکو له مسؤلینو سره لیدنه ترسره کړه
په دې لیدنه کې ښاغلي مولوي حمدالله زاهد د امیرالمؤمنین حفظهالله د فرمان پر عملي کولو ټینګار وکړ او زیاته یې کړه: پر وارداتو تکیه کول مو تل محتاج ساتي؛ خو پر داخلي تولید تکیه مو اقتصادي خپلواکۍ ته رسوي، چې دا چاره د هېواد دننه د پانګې راګرځېدو لامل کېږي، د کار زمینې برابروي او هم د کیفیت، مصؤنیت او مناسب قیمت تضمین کوي.
همدارنګه، د درملو تولیدوونکو فابریکو مسؤلینو او استازو د خوړو او درملو معینیت له هر اړخیز ملاتړ څخه د مننې ترڅنګ ډاډ څرګند کړ، چې دا څلور واړه درمل جوړونکي فابریکې په عصري ماشینرۍ او نوې ټکنالوژۍ سمبالې دي او په هېواد کې د اړتیا وړ ۲۱۷ ډوله درملو د تولید وړتیا لري.
ورته مهال د یادو فابریکو مسؤلینو وویل، دوی ژمن دي چې د اړتیا وړ کميت، ښه کیفیت او مناسب قیمت تضمین کړي.
د غونډې په پای کې د خوړو او درملو معینیت ژمنه وکړه، چې په نږدې راتلونکې کې به د هغو توکو وارداتو منع کړي، چې کورنۍ تولیدي فابریکې یې د بازار اړتیا پوره کولای شي.
د یادونې وړ ده، چې دا مهال په هېواد کې د درملو تولیدوونکو فابریکو شمېر ۱۱۰ څخه ډېر شوی او له ۶۵۰ قلمو څخه زیات تولیدي توکي تولیدوي.
