د ا.ا.ا د عامې روغتیا وزیر ښاغلي مولوي نور جلال جلالي د پروان له والي او د عامې روغتیا رئیس سره لیدنه ترسره او د وړاندې کېدونکو روغتیایي خدمتونو له بهیر څخه یې څارنه وکړه
د عامې روغتیا وزیر، ښاغلي مولوي نور جلال جلالي او مل پلاوي پروان ولایت ته د خپل رسمي سفر په ترڅ کې د دې ولایت له والي ښاغلي محمد ادریس انوري او د عامې روغتیا رئیس ډاکټر نیازمحمد مخلص سره لیدنه ترسره او په یو شمېر مهمو روغتیایي موضوعاتو یې خبرې وکړې.
دغه راز، د عامې روغتیا ښاغلي وزیر او مل پلاوي، چې د پروان والي یې هم ملتیا کوله، د جنګل باغ د ۲۰۰ بستریز روغتون او د چاریکار ښار ۱۰۰ بستریز تخصصي روغتون د پاتې رغنیزو چارو له بهیر څخه لیدنه وکړه.
ښاغلي وزیر د یادو روغتونونو له ټولو روغتیایي څانګو څخه لیدنه وکړه، د ناروغانو احوال یې واخیست او د شته ستونزو د حل په موخه یې اړوندو مسؤلینو ته لازمې لارښوونې وکړې.
د یادې لیدنې په دوام د پروان ولایت روغتیایي مسؤلینو په تفصیلي ډول د وړاندې کېدونکو روغتیایي خدمتونو وضعیت تشریح کړ او د روغتیایي خدمتونو د لا ښه والي او شته ستونزو د حل په موخه یې له ښاغلي وزیر سره خپل وړاندیزونه شریک کړل.
