د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د ماشومانو ژغورنې یا «سیف د چلډرن» مؤسسې له نوي مشر سره د مور او ماشوم د روغتیايي خدماتو ښه والي په موخه ناسته تر سره کړه
په دې ناسته کې چې د سیف د چلډرن مؤسسې نوي مشر (بوجر هوجا) او مخکیني مشر ارشد ملک هم شتون درلود، دواړو لوریو د مور او ماشوم د روغتیايي خدماتو په ښه والي، د مرستو پر جلبولو ، د روغتیايي مرکزونو د خدماتو پراختیا او د ماشومانو لپاره د روغتیایي خدماتو پروژو پر ډېر والي بحث او خبرې وکړې.
د عامې روغتیا ښاغلي وزیر، په دې ناسته کې د یادې مؤسسې د مخکینې مشر ارشد ملک ترسره کړي خدمات د قدر وړ وبلل او د دغې مؤسسې نوي مشر ښاغلي بوجر هوجا ته د ښه راغلاست ویلو ترڅنګ، له هغه سره د روغتیايي خدمتونو د پراختیا برخه کې مشورې شریکې کړې او په یادو برخو کې یې د هر راز همکارۍ ډاډ ورکړ.
بل لور، د سیف د چلډرن مؤسسې نوي مشر ژمنه وکړه، چې په افغانستان کې به د مور او ماشوم روغتیايي خدمات ښه؛ روغتیايي مرکزونه ډېر او د ماشومانو د روغتیايي خدماتو اړوند پروژې زیاتې کړي.
