د ا.ا.ا د عامې روغتیا وزارت له لوري لومړي ځل لپاره په هېواد کې د سرطاني ناروغیو د تشخیص او درملنې یو ملي روغتون پرانیسته ترسره او په خدماتو يې پيل وکړ
په همدې موخه جوړې شوې غونډه کې د عامې روغتیا وزیر ښاغلي مولوي نورجلال جلالي، د یاد وزارت مرستيالانو او مرکزي رئیسانو، د بېلا بېلو امارتي ادارو استازو، په افغانستان کې د ایران اسلامي جمهوري دولت سفیر ښاغلي علي رضا بېکدلي، د نړیوالو همکارو ادارو او رسنیو استازو ګډون کړی و.
د عامې روغتيا وزير، ښاغلي مولوي نور جلال جلالي وویل: ( له نېکه مرغه موږ دا روغتون د ګډو هڅو په پایله کې پرانیزو او هيله مند يو، چې دا روغتون به د سرطاني ناروغانو لپاره د درملنې او امید يوه سرچينه وي.
هغه زياته کړه، ډېر ژر به دې روغتون کې د داخلي متخصصینو روزنې په موخه روزنيز تخصصي پروګرامونه پیل شي او د اسانتیاوو او غوره امکاناتو برابرولو لپاره اړین اصلاحات تر کار لاندې نیول شوي دي.
ښاغلي وزير همداراز زیاته کړه، چې د هند له هېواد سره په همکارۍ به دې روغتون کې د راډیوتراپي خدمات هم برابر شي او تر اوسه هند هېواد د سرطاني ناروغیو درملنې برخه کې د يو ميليون ډالرو، چې لس ټنه درمل او طبي تجهیزات په کې شامل دي، مرسته کړې ده. همدارنګه، ښاغلي وزیر له خلکو، په ځانګړې توګه له پانګهوالو او خیریه بنسټونو څخه وغوښتل، چې د سرطاني ناروغانو د درملنې او ملاتړ برخه کې همکاري وکړي.
دغه راز، د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني وویل:( عامې روغتيا وزارت په تېرو څلورو کلونو کې د روغتیايي خدمتونو د پیاوړتیا په برخه کې اغېزمن ګامونه پورته کړي دي، چې له ډلې یې د ماشومانو د زړه جراحي عملیات او د سرطاني ناروغیو درملنې ملي روغتون پرانیستل یادولای شو. نوموړي زیاته کړه، عامې روغتیا وزارت د کاري شریکانو په همکارۍ هڅه کوي، چې روغتیايي خدمات لا پیاوړي کړي، تر څو هېوادوال درملنې لپاره د بهرنیو هېوادونو تګ ته اړ نه شي.
همداراز، په دې غونډه کې د عامې روغتيا وزارت د مقام د دفتر لوی رئيس، الحاج شيخ محمد طاهر حليم وويل:( د خوښۍ ځای دی چې د عامې روغتیا محترم وزیر په هڅو او د عالیقدر امیرالمؤمنین حفظه الله د شفقت په برکت، نن د ولس ارمان پوره شو او په ټول هېواد کې د سرطاني ناروغیو درملنې ملي روغتون پرانیستل کېږي).
سربېره پر دې د سرطان ملي پروګرام آمر، ډاکټر محمد شفیق امین وویل: ( دا روغتون د سرطاني ناروغیو د درملنې په برخه کې د نويو پرمختګونو پیل دی او په راتلونکي کې به لا ډېرې اسانتیاوې هم برابرې شي.
نوموړي زیاته کړه: نن موږ یوازې د یو روغتون پرانیسته نه کوو، بلکې د هیلو دروازې پرانیزو).
بل لور ته، د اروپايي ټولنې استازو د خپلو هر اړخیزو ویناوو سربېره د سرطاني ناروغیو د تشخیص او درملنې په برخه کې د دوامدارې همکارۍ ډاډ ورکړ.
