د عامې روغتیا وزارت له لوري د ملي او نړیوالو سازمانونو او مؤسساتو استازو او تمویل کوونکو سره د هیلت کلسټر ګډه ناسته ترسره شوه
دا ناسته چې د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني، د دې وزارت د مرکزي رئیسانو او د ملي او نړیوالو مؤسسو د استازو په شتون کې ترسره شوه د روغتیايي خدمتونو وړاندې کولو مرستيال په دې ناسته کې د روغتیایي خدماتو له تمویل کوونکو وغوښتل خپلې ادارې له دې وزارت سره په همغږۍ د بېړنیو پېښو او هېواد ته د راستنېدونکو کسانو بهیر د ښه مدیریت په موخه له وړاندې چمتو کړي، تر څو د اړتیا پر مهال ورته لازم خدمات وړاندې شي.
نوموړي زیاته کړه، چې په دې چمتووالي کې د روغتیایي خدماتو اړین کیټونو برابرول، روغتیايي مرکزونو ته د درملو استول، روغتیايي مصرفي مواد، ګرځنده روغتیايي ټیمونه، اضافي بسترونه، د راجع کولو سیستم، د واکسین او تغذیې خدمات، د میندو او ماشومانو اړوند خدمات او نور شامل دي، څو بېړنیو حالاتو کې ناروغانو او هېواد ته د راستنېدونکو کسانو لپاره لازم خدمات وړاندې شي.
بل لور، د ملي او نړیوالو مؤسسو او د عامې روغتیا وزارت د تمویل کوونکو استازو ژمنه وکړه، چې په دې برخه کې به له عامې روغتیا وزارت سره هر اړخېزه همکاري وکړي.
همدارنګه هغوی خپل وړاندیزونه او ننګونې د عامې روغتیا وزارت له رهبرۍ سره شریکې کړې، چې د حل په موخه ورته ډاډ ورکړل شو.
