د عامې روغتیا وزارت د عامه تغذیې ریاست له لوري د مور او ماشوم د تغذیې ملي لارښود د بیاکتنې او نوي کولو په موخه دوه ورځنی تخنیکي ورکشاپ ترسره شو
دغه ورکشاپ چې موخه یې د مور او ماشوم د تغذیې برخه کې د موجود ملي لارښود هر اړخیزه تخنیکي بیاکتنه، نوي کول او د نړیوالو شواهدو پر بنسټ د وروستیو سپارښتنو، په ځانګړې توګه د روغتیا نړیوال سازمان سره همغږي کول وو؛ په کې د عامې روغتیا وزارت د روغتيايي خدمتونو وړاندې کولو مرستیال، ښاغلي مولوي عبدلولي حقاني، د عامه تغذیې رئیس ډاکټر حکمت الله معصومي او اړوندو ملي او نړیوالو شریکانو ګډون کړی ؤ.
دغه بهیر د هېواد د موجوده شرایطو، تطبیقي ننګونو او د خدمتونو د وړاندې کولو له واقعي وضعیت سره سم تر سره کېږي؛ ترڅو یو معیاري، عملي او د تطبیق وړ لارښود چمتو شي، چې د ټولو روغتیايي کارکوونکو، په ځانګړي ډول د لومړۍ کرښې د خدماتو وړاندې کوونکو لپاره د باور وړ تخنیکي مرجع وګرځي.
د عامې روغتیا وزارت د روغتيايي خدمتونو وړاندې کولو مرستیال، د دغه نوښت ارزښت ته په اشارې وویل: د مور او ماشوم د تغذیې د ملي لارښود بیاکتنه او معیاري کول د عامه تغذیې په سکټور کې یو بنسټیز او ستراتیژیک پرمختګ بلل کېږي.
همدارنګه، د عامه تغذیې رئیس ډاکټر حکمت الله معصومي وویل: د عامه تغذیې ریاست او همکارو تخنیکي ادارو د ګډو مسلکي هڅو په پایله کې به نوی لارښود د خدماتو د کیفیت لوړولو، د تطبیق یو شانوالي او د شواهدو پر بنسټ د مداخلو پیاوړتیا لپاره یو مهم تخنیکي سند وي.
نوموړي زیاته کړه، چې دغه لارښود به د ډاکټرانو، نرسانو، قابلو او د تغذیې پروګرام د مدیرانو لپاره د عملي تطبیق یو اغېزمنه وسیله وګرځي؛ څو د هېواد په کچه د تغذیې خدمات د ملي معیارونو سره سم وړاندې شي.
د یادونې وړ ده، چې د مور او ماشوم د تغذیې موجود ملي لارښود د وروستي ځل لپاره په ۲۰۱۹م کال کې بیاکتل شوی و، خو د نړیوالو نویو لارښوونو او د تطبیقي تجربو پر بنسټ، ځینې مهمې تخنیکي تشې په کې موجودې وې، چې له ډلې یې مهم موارد په لاندې ډول دي:
د ژوند د دورې (Life Cycle Approach) پر بنسټ د تغذیې جامع لید، د نویو ځوانانو (Adolescents) تغذيه، د ماشوم د لومړنۍ ودې او انکشاف (ECD) د تغذیې یوځای کول او د تغذیې لپاره د چلند بدلون (SBCC) اغېزمن او سیستماتیک چوکاټ.
د همدې تخنیکي اړتیاوو او تشو د رفع کولو په موخه د مور او ماشوم د تغذیې ملي لارښود بیاکتنه او نوي کول یو مهم ستراتیژیک اقدام بلل کېږي؛ چې تمه ده لاندې پایلې به ولري: د شواهدو پر بنسټ د تغذیې مداخلاتو معیاري کول، د خدماتو د کیفیت ښه والی او د تطبیق یو شانوالی، د وقایوي (Preventive) او درملنیزو (Curative) مداخلاتو ترمنځ د توازن پیاوړتیا، د نسلونو ترمنځ خوارځواکۍ (Intergenerational Malnutrition) دورې د ماتولو لپاره د دوامدارو حل لارو رامنځته کول.
