په بلخ کې د پوزې دننه تومور لومړنی انډوسکوپیک عملیات په بریالیتوب ترسره شو
د بلخ په ابو علي سینا بلخي سیمه ییز روغتون کې په لومړي ځل د پوزې دننه تومور انډوسکوپیک جراحي عملیات (Functional Endoscopic Sinus Surgery) په بریالۍ توګه ترسره شو
دغه عمليات د ياد روغتون د غوږ، ستوني او پوزې تخصصي ټیم له لوري يو ۴۵ کلن ناروغ ته ترسره شو، چې د پوزې بندښت او سردرد ستونزې یې لرلې. یاد ناروغ د درملنې او څارنې له بشپړې دورې وروسته په ښه روغتیایي حالت کې له روغتون څخه رخصت شو.
د يادونې وړ ده، چې د دې روغتون د غوږ، ستوني او پوزې ناروغيو درملنې څانګې په تېر ۱۴۰۴ هـ ش کال کې په مجموعي توګه (۲۳٬۷۲۶) ناروغانو ته خدمات وړاندې کړي، چې له دې ډلې (۸۸۱) ناروغان بستر او (۸۷۴) کسانو ته لوی عملیاتونه ترسره شوي دي، چې دا شمېرې د یادې څانګې د پراخو او تخصصي روغتيايي خدماتو څرګندونه کوي.
