د عامې روغتیا وزارت د معالجوي طب لوی ریاست له لوري په عاجل ابن سینا روغتون کې د تخصصي او ثالثي روغتونونو د تېرو یو کلنو اجرااتو او فعالیتونو د بیاکتنې درې ورځنی ورکشاپ پیل شو
په همدې موخه جوړه شوې ناسته کې چې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د معالجوي طب لوی رئیس ډاکټر وحدت الکوزي، د پلان ګذارۍ او برنامه ریزۍ رئیس ډاکټر عبدالستار صحت، د تخصصي او ثالثي روغتونونو رئیس ډاکټر امین الله مومند، د مرکزي روغتونونو رئیسانو او یو شمېر نورو مسؤلینو شتون درلود، په روغتونونو کې د خدمتونو ښه والي، د اداري او مدریتي سیستم پیاوړتیا، د شته ستونزو او نیمګړتیاو د حل او د باکیفیته خدمتونو وړاندې کولو په موخه د اغېزمنو عملي پلانونو جوړولو په اړه بحث او خبرې ترسره شوې.
د روغتیایي خدمتونو وړاندې کولو مرستیال یاد ورکشاپ د راتلونکي لپاره د غوره کاري پلان ترتیبولو، ښې همغږۍ او تجروبو شریکولو برخه کې یو ارزښتمن فرصت وباله او ټینګار یې وکړ، چې د روغتونونو مسؤلین دې په دې ورکشاپ کې ذکر شویو موضوعاتو، د ستونزو حل او خپلو ټولو مسؤلیتونو ته لازمه پاملرنه وکړي؛ څو د روغتیایي خدمتونو کیفیت ښه او خلکو ته پر وخت اغېزمن خدمات وړاندې شي.
دغه راز، ښاغلي مرستیال هیله څرګنده کړه، چې دغه ورکشاپ به د ښې همغږۍ، روغتیایي خدمتونو د پیاوړتیا او د راتلونکو اغېزمنو پلانونو د جوړولو سبب وګرځي.
همداراز، د معالجوي طب لوی رئیس د ورکشاپ ګډونوالو ته د ورکشاپ موخې روښانه کړې او ټینګار یې وکړ، چې د روغتونونو مسؤلین دې په ورکشاپ کې خپله علمي او عملي ونډه واخلي.
همدارنګه، د تخصصي او ثالثي روغتونونو رئیس د مرکزي روغتونونو مسؤلینو ته یو شمېر لارښوونې او سپارښتنې ترسره او د لا غوره خدمتونو وړاندې کېدو ته یې وهڅول.
ورته مهال د مرکزي، تخصصي او ثالثي روغتونونو مسؤلینو د خپلو تر سره کړو فعالیتونو او خدماتو په اړه معلومات وړاندې او خپل نظرونه، وړاندیزونه او ستونزې یې له مرکزي مسؤلینو سره شریکې کړې.
