د عامې روغتیا وزیر له نړیوالو تمویلوونکو سره د روغتیايي خدماتو پر پیاوړتیا خبرې وکړې
د افغانستان ا.ا د عامې روغتيا وزير ښاغلي مولوي نور جلال جلالي د نړیوالو تمویلوونکو بنسټونو UNFPA، UNDP، نړیوال بانک ، ګلوبل فنډ ، GAVI ، ADB او اروپایي ټولنې له استازو سره پر لیکه مجلس ترسره کړ:
په دې مجلس کې د روغتیا ملي پالیسۍ پر سم تطبیق ، د راتلونکي ستراتیژیک لوري ټاکلو، د روغتیايي خدماتو پیاوړتیا او پراختیا ، له ۲۰۲۶ کال وروسته د تمویل د احتمالي کمښت، د مالي مسؤلیتونو د تدریجي لېږد د اړتیا او الهي پېښو او لوژستیکي ستونزو له کبله د رامنځته شویو ننګونو په اړه بحث او خبرې وشوې.
د عامې روغتیا وزیر د شریکانو له دوامداره ملاتړ څخه مننه وکړه او له تمویلوونکو یې وغوښتل، چې د لا زیاتو منابعو د جلبولو لپاره خپلې هڅې زیاتې کړي، همدارنګه ښاغلي وزير په تدریجي ډول د مالي مسؤلیتونو پر غاړه اخیستنې او د دوامداره روغتیايي خدماتو د وړاندې کولو لپاره مفصلې خبرې وکړې.
بل لور تمویلوونکو د وزارت له رهبرۍ څخه د مننې تر څنګ د روغتیايي خدماتو د دوام او له نړیوالو شریکانو سره د همغږۍ ملاتړ څرګند او د خپلو مرستو پر دوام یې ټینګار وکړ ، غونډه د دواړو لورو تر منځ د همکاریو د پیاوړتیا او د افغانستان خلکو ته د دوامداره روغتیايي خدماتو برابرولو په موخه د ژمنې په بیا تازه کولو سره پای ته ورسېده.
