د عامې روغتیا وزارت د ستراتیژيک پلان د بیاکتنې او نهايي کولو په موخه تخنیکي ناسته ترسره شوه
دغه ناسته چې د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي، مرکزي رئیسانو او د وزارت د بېلابېلو ریاستونو د یو شمېر استازو په شتون کې ترسره شوه، په کې د عامې روغتیا وزارت ستراتیژیک پلان د یو پریزنټېشن له لارې تشریح او وړاندې شو.
په دې ناسته کې د وزارت مرکزي رئیسانو او د تخنیکي کمېټو غړو د یاد ستراتیژیک پلان د لا ښه والي او نهايي کولو په موخه خپل نظرونه او وړاندیزونه شريک کړل.
ښاغلي مرستیال د ګډونوالو نظریات او وړاندیزونه واورېدل او د وزارت له بېلابېلو ادارو څخه یې یوه تخنیکي کمېټه وټاکله، څو هغه اصلاحات او وړاندیزونه چې د کمېټو غړو مطرح کړي وو، په پلان کې شامل او د راتلونکو پړاوونو او اجراآتو لپاره یې چمتو کړي.
