د عامې روغتیا وزارت د روغتيايي خدمتونو وړاندې کولو مرستيال، ښاغلي مولوي عبدالولي حقاني ننګرهار ته د خپل رسمي سفر په ترڅ کې د دې ولايت له سیمهییز روغتون څخه ليدنه وکړه
د دې لیدنې موخه په ياد روغتون کې د وړاندې کېدونکو روغتيايي خدمتونو څارنه او ارزونه وه، چې په ترڅ کې ښاغلي مرستيال د روغتون بېلا بېلې برخې له نږدې وليدې او روغتیايي کارکوونکو ته يې د غوره خدمتونو وړاندې کولو په موخه لازمې سپارښتنې وکړې.
ښاغلي مرستيال همداراز، د ننګرهار د عامې روغتيا له رئيس مولوي امين الله شريف، د سيمه ييزو روغتون له مسؤلينو او د يونيسيف ادارې له استازو سره ناسته تر سره او اړوندو مؤسسو ته يې سپارښتنه وکړه، چې د روغتیايي خدمتونو کیفیت لوړولو او د ناروغانو ستونزو ته رسېدنې برخه کې لازم اقدامات ترسره کړي.
همدارنګه، نوموړي د عامې روغتیا ریاست، يونيسيف او تطبیق کوونکو مؤسسو ترمنځ پر لا زیاتې همغږۍ ټینګار وکړ، تر څو د روغتونونو اړتیاوو ته پر وخت رسېدنه وشي او روغتیايي خدمتونه په شفاف او اغېزمن ډول وړاندې شي.
