د روغتیايي پراختیا او پالیسۍ مرستیال په خپل کاري دفتر کې غونډه تر سره کړه
د عامې روغتیا وزارت د روغتیايي پراختیا او پالیسۍ مرستیال، ډاکټر محمد حسن غیاثي له لوري په خپل کاري دفتر کې د سرویلانس څانګې د ۲۰۲۳ م کال لاسته راوړنې د یوې ناستې په ترڅ کې تر بحث لاندې ونیول شوې.
په دې ناسته کې د یاد وزارت مرکزي رئیسانو، آمرینو، د روغتیا نړیوال سازمان او یونیسف استازو ګډون کړی و، چې موخه یې د ساري ناروغیو ټولو هغه ناڅاپي پېښو او ورته نورو روغتیايي ستونزو ته پر وخت رسېدنه، چې د اړوندو ادارو له لوري ورته په تېر کال کې ځواب ویل شوی او په راتلونکي کال کې به د ورته پېښو په اړه کوم اقدامات ترسره کړي وه.
د روغتیايي پراختیا او پالیسۍ مرستیال په تېر یو کال کې د اړوندو ادارو له لوري د ترسره شوو کړنو له امله د مننې تر څنګ له مسؤلینو وغوښتل، چې په راتلونکي کال کې د ورته بېړنیو او ناڅاپي پېښو د مخنیوي لپاره لا هڅه وکړي او په دې اړه د خپلو ادارو تطبیق کوونکي پلانونه ژر تر ژره چمتو او زموږ سره شریک کړي؛ تر څو د ناروغانو روغتیايي ستونزو ته پر وخت رسېدنه ترسره شي.
