د روغتونونو د خپلواکۍ طرحې پلي کول تر ارزونې لاندې ونیول شو
یکشنبه، چنګاښ ٦/١٤٠٠
د عامې روغتیا وزارت، مالي او اداري مرستیالې ډاکتر وژمه سالمي، د کابل روغتونونو رییسانو سره په یوه ناسته کې د روغتونونو د خپلواکي طرحې د پلي کولو ازمایښتي مرحله تر ارزونې لانې ونیوله.
په دې ناسته کې لومړی، د روغتون د خپلواکۍ طرحه د دریو بېلابېلو پرزنټېشنونو په ترڅ کې ګډونوالو ته تشرېح شوه، وروسته د روغتونونو رییسانو د دې طرحې د ښه پلي کېدو لپاره خپل نظریات او وړاندیزونه وړاندې کړل.
د مالي او اداري مرستیالې د ګډونواولو د نظریاتو او وړاندیزونو له اورېدو وروسته وویل: د روغتونونو د استقلالیت/خپلواکۍ طرحې پلي کول به لومړی د کابل په څلورو روغتونونو کې په ازمایښتي توګه پیل شي او تمه کېږي چې دا طرحه به د مالي کال ترپایه د کابل په 21 دولتي روغتونونو کې پلي شي.
ډاکتر سالمي زیاته کړه چې د عامې روغتیا وزارت د روغتونونو د خپلواکۍ طرحې د پلي کولو لپاره ټیمونه ګمارلي دي، ترڅو په دې برخه کې د روغتونونو له مسؤولینو سره همکاري وکړي او د روغتونونو له رییسانو څخه یې وغوښتل چې د دې طرحې په پلي کولو کې د عامې روغتیا وزارت سره بشپړه همکاري وکړي.
د یادونې وړ ده چې د روغتونونو خپلواکي طرحه د افغانستان دولت د کابینې غونډې لخوا تصویب شوې او دا طرحه به لومړی د استقلال، رابعه بلخي، اندراګاندي صحت طفل او د اتا ترک ملي روغتونونو کې په ازمایښتي توګه پلي شي او نورو روغتونونو کې به دا بهیر د مهالوېش مطابق تطبیق او پلي شي.
