د ا.ا.ا د ریاست الوزراء عالي مقام اداري مرستیال د وزیر محمد اکبر خان روغتون څخه لیدنه وکړه
د ا.ا.ا د ریاست الوزراء عالي مقام اداري مرستیال ښاغلي مولوي عبدالسلام حنفي نن د شنبې ورځ چې د ۱۴۴۷ هـ ق کال د شوال المکرم د میاشتې له ۳ مې نېټې سره برابره ده، په وزیر محمد اکبر خان ملي او تخصصي روغتون کې د وروستۍ پېښې ټپیانو څخه لیدنه وکړه، په دې لیدنه کې لومړی د ریاست الوزراء ښاغلي اداري مرستیال د ټولو مسلمانانو، په ځانګړې توګه د افغانستان د معزز ملت د عباداتو د قبلېدو دعا وکړه او د نیکمرغه کوچني اختر د رارسېدو مبارکي یې د روغتون مسئولینو، ډاکترانو، روغتیايي کارکوونکو او همدارنګه ناروغانو ته وړاندې کړه.
ښاغلي مولوي عبدالسلام حنفي د پاکستان پوځي رژیم له لوري د معتادینو پر روغتون د وروستۍ پېښې ټپیانو د عیادت او پوښتنې تر څنګ د روغتون له مسئولینو، ډاکترانو او نورو بستر ناروغانو سره له نږدې خبرې وکړې، د هغوی ستونزې او غوښتنې یې واورېدې او ډاډ یې ورکړ چې اسلامي امارت به د هغوی ستونزو او غوښتنو ته رسیدنه وکړي او د روغتیايي خدمتونو د ښه والي لپاره به هڅې وکړي.
د ریاست الوزراء اداري مرستیال په پای کې د ټولو ناروغانو او ټپیانو د ژر روغتیا لپاره دعا وکړه او د روغتیايي کارکوونکو لپاره یې د الله تعالی له دربار څخه د لا زیاتې بریا او توفیق غوښتنه وکړه.
