د ا.ا.ا د عامې روغتیا وزارت د رهبرۍ بورډ شلمه ناسته تر سره شوه
دا ناسته چې د عامې روغتیا وزیر، ښاغلي مولوي نور جلال جلالي په مشرۍ، د وزارت د مرستیالانو او مرکزي رئیسانو په شتون کې ترسره شوه، ترکیې هېواد ته د روغتيايي خدمتونو وړاندې کولو مرستيال ښاغلي مولوي عبدالولي حقاني، همدارنګه هندوستان او عربي اماراتو ته د خوړو او درملو مرستيال، ښاغلي مولوي حمدالله زاهد او مل تخنيکي پلاوي د سفر د موخو او لاسته راوړنو په اړه، چې د يو پريزنټېشن په ترڅ کې تشريح شول، بحث او خبرې تر سره شوې.
سربېره پردې، د بهرنيو ډاکټرانو د اسنادونو او جوازونو ارزونې په موخه د طبي شورا د لوی رئیس ښاغلي ډاکټر فقير محمد زيار کاري راپور وړاندې کول، په ۱۴۰۴ هجري لمريز کال کې د ګمارل شويو کارکوونکو، اجراء شويو احتياطي کوډونو او خالي بستونو په اړه د کارکوونکو چارو لوی رئيس عرفان الله کريمي د راپور ورکول، مسؤليتونو ته لا زياته پاملرنه، دندو ته پر ټاکلي وخت حاضرېدل او لا زياته همغږي د دې ناستې له نورو مهمو موضوعاتو څخه وو، چې په اړه یې خبرې وشوې.
د عامې روغتیا ښاغلي وزیر، د پورته ذکر شویو موضوعاتو په عملي اجرااتو ټينګار وکړ او لارښوونه يې وکړه، چې ټولې چارې دې په بشپړ شفافيت تر سره او پر ټاکلي وخت او سمه توګه دې ورته رسېدنه وشي.
دغه راز، په دې ناسته کې د عامې روغتیا وزارت مرستیالانو او مرکزي رئیسانو د چارو د ښه والي په موخه خپل نظرونه او وړانديزونه شريک کړل او ژمنه يې وکړه، چې د شويو پرېکړو په برخه کې به لازم اقدامات تر سره کوي.
