د جوزجان ولایت درزآب ولسوالۍ کې یو د روغتیایي مرکز ودانۍ ګټې اخیستنې ته وسپارل شوه
د افغانستان اسلامي امارت د عامې روغتیا وزارت له لوري د جوزجان ولايت درزآب ولسوالۍ بتو کلي کې د سل زره امریکايي ډالرو په لګښت د یو روغتیايي مرکز ودانۍ جوړه او د ځانګړو مراسمو په ترڅ کې ګټې اخیستنې ته وسپارل شو.
په دغو مراسمو کې د عامې روغتيا وزارت د مالي او اداري چارو مرستيال مولوي محمد اسحاق صاحبزاده، د جوزجان د عامې روغتیا رئيس قاري ذبيح الله حسيني، قومي مشرانو ، علماء کرامو او یو شمیر نورو مسؤولینو ګډون کړی و.
په همدې موخه جوړو شویو مراسمو کې د عامې روغتيا وزارت د مالي او اداري چارو مرستيال مولوي محمد اسحاق صاحبزاده وویل: چې اسلامي امارت په ځانګړې توګه د عامې روغتیا وزارت د خپل دردیدلي او کړیدلي ولس لپاره د غوره روغتیایي خدمتونو وړاندې کولو هڅو په لړ کې یې د جوزجان ولایت په درزآب ولسوالۍ کې د سل زره امریکایي ډالرو په لګښت یو روغتیايي مرکز ګټې اخیستنې ته وسپاره چې د پنځه زره کورنیو لپاره به د روغتیايي ستونزو حل کې د پام وړ بدلونونه رامنځته کړي.
