د جوزجان په ۲۰۰ بستریز ولایتي روغتون کې د عاجل روغتیايي خدماتو څانګې د جوړېدو د بنسټ ډبره کېښودل شوه
د افغانستان اسلامي امارت عامې روغتیا وزارت له لوري د جوزجان په ۲۰۰ بستریز ولایتي روغتون کې د ۲۵ میلیونه افغانیو په ارزښت د عاجل روغتیايي خدماتو څانګې د جوړېدو د بنسټ ډبره کېښودل شوه
په همدې موخه جوړو شویو مراسمو کې د ریاست الوزراء عالي مقام اداري مرستیال، ښاغلي مولوي عبدالسلام حنفي، د جوزجان والي قاري ګل حیدر شفق، د عامې روغتیا رئیس قاري ذبیح الله حسیني او په یاد ولایت کې د یو شمېر نورو ادارو مسؤلینو شتون درلود.
د ریاست الوزراء عالي مقام اداري مرستیال، ښاغلي مولوي عبدالسلام حنفي د دغه روغتیايي څانګې په جوړېدو خوښي څرګنده کړه او ویې ویل، د افغانستان اسلامي امارت ژمن دی چې د هېواد ټولو وګړو ته د نورو برخو تر څنګ په روغتیايي برخه کې هم غوره خدمات وړاندې کړي، چې په همدې موخه د عامې روغتیا وزارت له لوري د اسلامي امارت له داخلي بودیجې څخه د یادې څانګې د جوړېدو لپاره ۲۵ میلیونه افغانۍ ځانګړې شوي، چې عملاً یې د جوړېدو چارې پیل او په نږدې راتلونکي کې به ګټې اخیستنې ته وسپارل شي.
نوموړي همداراز زیاته کړه، یاده څانګه به په عصري ډول جوړه او په اړینو طبي تجهیزاتو به سمبال وي، چې په مرسته به یې د یاد ولایت اوسېدونکو ته د روغتیا په برخه کې ګڼې اسانتیاوې رامنځته او تر ډېره به یې روغتیايي ستونزې حل شي.
له بل لوري د جوزجان عامې روغتیا رئیس، قاري ذبیح الله حسیني وویل، د دې څانګې په جوړېدو سره به د یاد ولایت ناروغانو ته په اکسری، الټراساونډ، عاجل داخله او عاجل جراحي څانګو کې روغتیايي خدمات وړاندې کېږي.
