د عامې روغتیا وزارت د خوړو او درملو مرستیال په خپل کاري دفتر کې د درملو او طبي تجهیزاتو د وارداتي اتحادیې له مسؤلینو او غړو سره لیدنه وکړه
د عامې روغتیا وزارت د خوړو او درملو مرستیال ښاغلي مولوي حمدالله زاهد، چې د دغه معینیت د بېلابېلو څانګو رئیسانو هم شتون درلود، د هېواد د درملو او طبي تجهیزاتو د وارداتي اتحادیې له مسؤلینو او غړو سره لیدنه ترسره کړه.
په دې لیدنه کې د خوړو او درملو معینیت د رهبرۍ پلاوي د اتحادیې غړو ته د ښه راغلاست ترڅنګ، د ا.ا.ا د ریاست الوزرا له لوري منظور شوې مصوبې په اړه هر اړخیز معلومات وړاندې کړل او هغه اسانتیاوې، چې د پخوانیو (ګراندفادر) او نویو شرکتونو د وارداتي توکو د پروفورم ثبت برخه کې رامنځته شوې دي، له ګډونوالو سره شریکې شوې.
همدارنګه، د درملو او طبي تجهیزاتو د وارداتي اتحادیې مسؤلینو او غړو په رامنځته شویو اسانتیاوو خوښي وښوده او د هېواد د خلکو او اتحادیې د ستونزو حل برخه کې یې د خوړو او درملو معینیت د ملاتړ ستاینه وکړه. دغه راز، هغوی د درملو د وارداتو، د نویو شرکتونو د ثبت او په پاکستان هېواد کې د پاتې شویو اموالو د وضعیت اړوند ستونزې د خوړو او درملو مرستیال سره شریکې کړې.
د عامې روغتیا وزارت د خوړو او درملو مرستیال ډاډ ورکړ، چې یادې ستونزې به د نافذه قوانینو او اصولو په چوکاټ کې په هر اړخیزه توګه وڅېړل شي او ورته به رسېدنه وشي.
د یادونې وړ ده، چې د خوړو او درملو معینیت له پاکستان هېواد څخه د درملو د وارداتو منع کولو پرېکړې د تطبیق په موخه یوه کمېټه ټاکلې ده؛ ترڅو یو تطبیقي پلان چمتو او وړاندې کړي. دا پلان د دې لپاره ترتیب شوی، چې د پاکستاني درملو د تدریجي حذف بهیر په داسې ډول مدیریت شي، چې د درملو په بازار کې جدي تشه رامنځته نه شي او د هېواد د روغتیايي سیستمونو اړتیاوې تأمین شي.
