د عامې روغتیا وزارت د خوړو او درملو معینیت تخنیکی پلاوی د درملو او روغتیایي محصولاتو د تنظیم لوی رئیس، حافظ ډاکتر نعیم الله ایوبي په مشرۍ بنګله دېش هېواد ته په رسمي سفر لاړ
د دې سفر موخې د بنګله دېش هېواد د درملو له هغو تولیدي کمپنیو څخه تخنیکی نظارت دی، چې د عامې روغتیا وزارت په خوړو او درملو معينيت کې ثبت دي، د بنګله دېش د درملو له ادارې سره د هوکړه ليک تعقیب، د بنګله دېش هېواد د درملو صنعت کارانو هڅول؛ ترڅو په افغانستان کې د درملو د تولید په برخه کې پانګونه وکړي، د هغو افغان تجارانو لپاره چې د بنګله دېش هېواد د درملو له تولیدي کمپنیو سره د درملو د واردولو قراردادونه لري او کمپنۍ او درملیز اقلام یې ثبت دي د تسهیلاتو برابرول، د درملو د تولید په برخه کې د بنګله دېش د تخنیکي همکاریو جلبول، د افغانستان او بنګله دېش ترمنځ د تجارتي اړیکو پیاوړتیا او د تېر سفر د موضوعاتو تعقیب، چې درې میاشتې وړاندې ترسره شوی و، دي.
سربېره پر دې به یاد پلاوی په بنګله دېش کې د درملو د برخې افغان تجارانو ستونزې د کوربه هېواد له اړونده ادارو سره شریکې کړي؛ تر څو په دې برخه کې افغان تجارانو ته لا زیاتې اسانتیاوې برابرې شي.
