د عامې روغتیا وزارت د روغتونونو لپاره د الکترونیکي روغتیایي ریکارډ او درملنې د ثبت پر سیستم ناسته وکړه
د ا.ا.ا د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي د ناروغانو (EMR) الکترونیکي روغتیایي ریکارډ او د هیواد په ټولو روغتونو کې د توصیه کیدونکو روغتیایي درملنو د الکترونیکي ثبت او تجویز کیدو په موخه د وزارت له اړونده مسؤولینو او ځینې تخنیکي اشخاصو سره ناسته تر سره کړه:
په دې ناسته کې چې د مالي او اداري چارو مرستیال ښاغلي قاري عبدالولي صدیقي، د اکمال تخصص لوی رئیس ډاکټر نثار احمد نیازي د معالجوي طب لوی رئیس ډاکټر وحدت الکوزي او یو شمیر نورو مسؤولینو شتون درلود ، د سیستم الکترونیکي کیدو په موخه د تخنیکي اشخاصو بیلا بیل نظریات واوریدل شول ، همدارنګه د سیستم د غوره تطبیق پر وړاندې د شته خنډونو ، حل لارو ، امکاناتو او د پلي کیدو لپاره د اسانتیاوو را منځته کولو اړوند بحث او خبرې تر سره شوې.
ښاغلي مرستیال وویل ، هڅه یې د خدماتو شفافیت ، د کارونو اسانتیا او د ولسونو او ناروغانو لپاره د معیاري الکترونیکي ریکارډ را منځته کول دي تر څو هر څوک هر ځای ترې استفاده وکړي او په روغتیایي خدماتو کې مثبت بدلون وموندل شي.
