د عامې روغتیا وزارت د روغتیایي خدمتونو وړاندې کولو مرستیال د اندراګاندي روغتون له خدمتونو او روغتیايي وضعیت څخه لیدنه وکړه
د عامې روغتیا وزارت د روغتیایي خدماتو وړاندې کولو مرستیال، ښاغلي مولوي عبدالولي حقاني له مل پلاوي سره په ګډه د اندراګاندي د ماشومانو درملنې روغتون د خدمتونو له بهیر څخه ليدنه وکړه
د روغتیایي خدمتونو وړاندې کولو مرستیال د ياد روغتون له ټولو څانګو څخه د ليدنې ترڅنګ روغتیايي کارکوونکو ته لازمې لارښوونې وکړې؛ تر څو د ناروغانو د ستونزو په حل او د روغتیایي خدماتو کیفیت لوړولو کې لا زیاتې هڅې ترسره کړي.
ښاغلي مرستیال ټینګار وکړ، هر روغتیايي کارکوونکی مکلف دی، چې خپل ایماني او وجداني مسؤلیت په غوره ډول اداء کړي او ترې ویې وغوښتل، چې خپلې دندې په بشپړ صداقت سره ترسره کړي.
همدارنګه، د روغتیایي خدمتونو وړاندې کولو مرستیال له ناروغانو او اړوند مراجعینو سره هم لیدنه وکړه او د هغوی د شکایتونو او رضایت کچې په اړه یې معلومات ترلاسه کړل؛ ترڅو ناروغانو ته خدمات په غوره ډول وړاندې شي.
