د عامې روغتیا وزیر، ښاغلي مولوي نور جلال جلالي په خپل کاري دفتر کې د غور عامې روغتیا رئیس، مولوي عبدالواحد حماس سره ليدنه وکړه
په دې لیدنه کې د غور ولایت د روغتیايي خدمتونو پر وضعیت، شته ستونزو، ننګونو او د روغتیايي مرکزونو پر بنسټیزو اړتیاوو بحث او خبرې وشوې. د غور عامې روغتیا رئیس د روغتیايي مرکزونو تجهیز، د درملو او طبي تجهیزاتو برابرول، د بشري سرچینو پیاوړتیا، په لرې پرتو سیمو کې د روغتیايي خدمتونو پراختیا او په دغه ولایت کې د روغتیايي سکتور يو شمېر نورې اړتیاوې د عامې روغتیا له ښاغلي وزیر سره شریکې کړې.
د عامې روغتیا وزیر د وړاندې شوي راپور او وړاندیزونو تر اورېدو وروسته د شته امکاناتو او روانو پروګرامونو په چوکاټ کې د یادو ستونزو او اړتیاوو د حل پر اړتیا ټینګار وکړ او ډاډ یې ورکړ، چې عامې روغتیا وزارت به په غور ولایت کې د روغتیايي خدمتونو ښه والي او پیاوړتیا لپاره دوامداره هڅې او ځانګړې پاملرنه کوي.
