د عامې روغتیا وزیر، ښاغلي ډاکټر قلندر عباد په خپل کاري دفتر کې د افغانستان لپاره د ترکیې له سفیر، جِنک اونال سره لیدنه ترسره کړه
په دې لیدنه کې د روغتیا په برخه کې په ګډه همکارۍ، د افغان روغتيايي پرسونل د ظرفیت لوړونې، په روغتیايي برخه کې د ترکیې هېواد د ونډې او د دواړو هېوادونو تر منځ د لا دوامداره همکاریو په اړه بحث او خبرې ترسره شوې.
ښاغلي وزیر، د افغانستان او ترکیې هيواد ترمنځ اړیکې اړینې وبللې، ښاغلي وزير د اتاترک د کوچنيانو د درملنې تخصصي روغتون او د هېواد په شمالي ولایتونو ( جوزجان، فاریاب او تخار) کې د ترکیې هېواد له لوري د جوړو شويو روغتيايي مراکزو سره د یاد هېواد له لوري د روغتیايي مرستو مننه او قدردانی وکړ.
ښاغلي وزیر همدا راز وویل، د افغان روغتيايي پرسونل ظرفیت لوړونه زموږ له لومړیتوبونو څخه ده او په همدې برخه کې له بيلا بيلو لارو هڅې کوو تر څو د ظرفيت لوړونې لپاره زمينه سازي وشي.
د ترکیې هيواد سفیر په روغتیايي برخه کې د ګډ کار او پر دوامداره همکارۍ خوښي څرګنده کړه او و یې ویل، موږ په نورو برخو کې د همکارۍ تر څنګ ژمن یو، چې د روغتیا په برخه کې د افغانستان سره دومداره مرسته او همکاري وکړو.
