د مرکزي روغتونونو له رئیسانو سره د همغږۍ میاشتنۍ ناسته ترسره شوه
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني په مشرۍ د مرکزي روغتونونو له رئیسانو سره د همغږۍ میاشتنۍ نوبتي ناسته ترسره شوه
په یاده ناسته کې د روغتیایي خدمتونو وړاندې کولو مرستیال، ښاغلي مولوي عبدالولي حقاني، د معالجوي طب لوی رئیس ډاکټر وحدت الکوزي، د تخصصي او ثالثي روغتونونو رئیس ډاکټر آمینالله مومند او د مرکزي روغتونونو رئیسانو ګډون کړی و.
په دې ناسته کې ښاغلي مرستيال د مرکزي روغتونونو د رئیسانو له ترسره کړو خدمتونو قدرداني وکړه او هغوی یې خپلو مسؤلیتونو ته لا متوجه کړل.
ښاغلي حقاني په روغتونونو کې د مسؤلینو او روغتیایي پرسونل پر منظمې حاضرۍ، ناروغانو ته د معیاري روغتیایي خدمتونو پر وړاندې کولو او د اداري اصولو پر رعایت ټینګار وکړ او څرګنده یې کړه، چې د دغو مواردو جدي مراعت کولای شي په روغتونونو کې شته ستونزې راکمې او د روغتیایي خدمتونو وړاندې کولو بهیر لا ښه کړي.
دغه راز، د مرکزي روغتونونو رئیسانو د شته ستونزو ژر حل او د روغتیایي خدمتونو لا ښه والي په برخه کې ډاډ څرګند او د روغتونونو د فعالیتونو لا پیاوړتیا په موخه یې یو شمېر وړاندیزونه او غوښتنې وکړې، چې د بودیجې او تشکیلاتو زیاتوالی او نور موضوعات په کې شامل وو، چې د مسئولینو له لوري ورته د لازمې پاملرنې ډاډ ورکړل شو.
