سمنګان ولایت کې د دوه میلیونه افغانیو په لګښت یو روغتیايي مرکز جوړ او په فعالیت یې پیل وکړ
دغه روغتیايي مرکز چې د «رباطک» په سیمه کې موقعیت لري، د سمنګان ولایت عامې روغتیا ریاست د استازو، قومي مشرانو او د سیمې د یو شمېر اوسېدونکو په شتون کې یې پرانیسته ترسره او ګټې اخیستنې ته وسپارل شو.
دغه پروژه د سمنګان عامې روغتیا ریاست مسؤلینو د هلو ځلو په پایله کې د دوه میلیونه افغانیو په ټولیز لګښت د ACTED دفتر له لوري د ناروې هېواد په مالي ملاتړ تطبیق شوې ده. په یاده پروژه کې د روغتیايي خدمتونو وړاندې کولو لپاره د پنځو معیاري کانکسونو او د احاطې د دیوال جوړول شامل دي.
د دې پروژې په بشپړېدو او پرانیستلو سره د سیمې شاوخوا ۱۸ زره اوسېدونکو ته په مستقیم او غیر مستقیم ډول بنسټیزو روغتیايي خدمتونو ته د لاسرسي زمینه برابره شوې ده.
د سمنګان عامې روغتیا ریاست استازي د دغه مرکز پرانیسته په لرې پرتو سیمو کې د روغتیايي خدمتونو ښه والي برخه کې یو مهم ګام وباله او د روغتیايي سیستم پیاوړتیا او خلکو ته د لا زیاتو اسانتیاوو برابرولو لپاره یې د دغه ډول هڅو پر دوام ټینګار وکړ.
