نورستان کې سېلابځپلو ته د روغتیايي خدمتونو د وړاندې کولو په موخه مرسته وسپارل شوه
د عامې روغتیا وزارت د بېړنیو پېښو پر وړاندې د چمتووالي او غبرګون (EPR) ټیم نورستان ولایت کې د وروستي سېلاب له امله زیانمنو شویو هېوادوالو ته د غوره روغتیايي خدمتونو وړاندې کولو په موخه د لغمان عامې روغتیا ریاست له لوري رالېږل شوې مرسته، چې په کې درمل، طبي وسایل او نغدې پیسې شاملې وې، د دغه ولایت مرستیال والي او عامې روغتیا رئیس ته د یوې ناستې په ترڅ کې وسپارله.
د نورستان مرستیال والي، مولوي فیصل مختار د دغه مرستې په موخه د لغمان عامې روغتيا رياست او په ځانګړي ډول له عامې روغتیا وزارت څخه مننه وکړه چې د نورستان وروستۍ پېښې ته یې پر وخت رسېدنه ترسره کړې.
