د عامې روغتیا وزارت د حادې خوارځواکۍ د وقایې او درملنې ملي لارښود د روزونکو د روزنې (TOT) لړۍ بشپړه کړه
د افغانستان ا.ا. د عامې روغتیا وزارت د تغذیې خدمتونو د پیاوړتیا په موخه د حادې خوارځواکۍ د وقایې او درملنې ملي لارښود د روزونکو د روزنې (TOT) لړۍ په بریالیتوب سره بشپړه کړه
دغه روزنیزه لړۍ په څلورو دورو کې ترسره شوه، چې په ترڅ کې یې ۱۵۰ تنه د تغذیې متخصصین او اړوند مسؤلین وروزل شول. په وروستۍ دوره کې له مرکز او ولایتونو څخه ۴۶ تنه متخصصینو او مسؤلینو ګډون کړی و، چې د خوارځواکۍ د پروګرامونو په پلان جوړونه او د وقایوي او درملیزو فعالیتونو په پلي کولو کې مهم رول لري.
په دې پروګرام کې ګډونوالو ته د مجربو استادانو له لوري معیاري روزنه ورکړل شوه، څو په خپلو ولایتونو کې د لومړۍ کرښې روغتیايي کارکوونکو د ظرفیت لوړونې بهیر رهبري کړي.
تمه ده، چې د دې روزنې له لارې به په ټول هېواد کې د تغذیې خدمتونو د تطبیق، کیفیت او راپور ورکونې بهیر لا معیاري شي.
د دې روزنيزې برنامې په پای کې د عامې روغتیا وزارت د ویاندویۍ، اطلاعاتو او عامه اړیکو رئیس، ډاکټر شرافت زمان د حادې خوارځواکۍ د وقایې او درملنې پروګرامونه د هېواد لپاره مهم وبلل او ویې ویل، چې د دغو پروګرامونو له لارې میلیونونو میندو او ماشومانو ته باکیفیته او معیاري روغتیايي او تغذیوي خدمتونه وړاندې کېدای شي.
دغه راز، د عامه تغذیې رئیس ډاکټر حکمت الله معصومي، له روزونکو، همکارو ادارو او د روزنیزې لړۍ له ملاتړ کوونکو څخه مننه وکړه او له ګډونوالو یې وغوښتل، چې ترلاسه شوې پوهه په خپلو کاري برخو کې په اغېزمن ډول پلې کړي.
د یونیسف د تغذیې برخې مدیر، ښاغلي ګلبرت ډاچي، هم د عامې روغتیا وزارت له رهبرۍ څخه مننه وکړه او د حادې خوارځواکۍ د وقایې او درملنې پروګرامونو د دوامدار ملاتړ ډاډ یې ورکړ.
د یادونې وړ ده، چې د عامې روغتیا وزارت د عامه تغذیې ریاست په وروستیو کلونو کې د تغذیې پروګرامونو د ظرفیت لوړونې، د روغتیايي کارکوونکو د مسلکي وړتیاوو د پیاوړتیا او د معیاري تغذیوي خدمتونو د پراختیا په برخه کې د پام وړ اغېزمن ګامونه پورته کړي او دا لړۍ لا هم دوام لري.
