د افغانستان ا.ا. د عامې روغتيا وزير، ښاغلي مولوي نور جلال جلالي په مشرۍ د دولتي روغتونونو د ډيجيټل کولو په موخه له اړوندو مسؤلينو سره ناسته تر سره شوه
ياده ناسته چې د عامې روغتيا وزارت په مقام کې تر سره شوه، د دولتي روغتونونو د ډيجيټل کولو پر بهير، د اړوندو برخو د برېښنايي کولو پر څرنګوالي او د روغتيايي معلوماتو د ثبت او مديريت په برخه کې پر شته امکاناتو او اړتياوو بحث او خبرې وشوې.
د عامې روغتيا وزير وويل: د روغتونونو ډيجيټل کول به د ناروغانو د ثبت، روغتيايي معلوماتو د خوندي ساتلو، د درملو او طبي تجهيزاتو مديريت، مالي او اداري چارو، عوايدو او لګښتونو او د روغتيايي خدمتونو وړاندې کولو په برخو کې لا زيات شفافيت رامنځته کړي.
ښاغلي وزير ټينګار وکړ، چې د روغتونونو ډيجيټل کول د روغتيايي نظام د عصري کولو له مهمو برخو څخه دی او په عملي کېدو سره به يې د ناروغانو د خدمتونو بهير چټک، د روغتيايي کارکوونکو چارې منظمې او د خدمتونو په کيفيت کې به د پام وړ ښه والی رامنځته شي. هغه د اړوندو ادارو مسؤلينو ته لارښوونه وکړه، چې د دې پروسې د بشپړ پلي کېدو لپاره لازم اقدامات ترسره کړي.
