د افغانستان د روغتیايي خدمتونو وړاندې کولو نوي سند د بیاکتنې او نهایي کولو په موخه د رهبرۍ او تخنیکي کمېټې غونډه ترسره شوه

ياده غونډه چې د عامې روغتیا وزارت د روغتیايي پراختيا او پالیسۍ مرستیال، ښاغلي ډاکټر محمد حسن غیاثي په مشرۍ د وزارت مرکزي رئیسانو، یونیسف نړيوالې ادارې، روغتیا نړیوال سازمان او د یو شمېر نورو نادولتي مؤسسو (NGOs) د استازو په ګډون تر سره شوه، په ترڅ کې يې د افغانستان د روغتیايي خدمتونو وړاندې کولو نوی سند د یوې پریزنټېشن له لارې تشریح او وړاندې شو.

همدارنګه، د تخنیکي کمېټو غړو او نورو ګډونوالو د ياد سند د لا ښه والي او بشپړولو په موخه خپل نظرونه او وړاندیزونه شريک کړل.

د روغتیايي پراختيا او پالیسۍ مرستیال د ګډونوالو د نظرونو او وړاندیزونو له اورېدو وروسته، د بېلابېلو ادارو له استازو څخه یوه تخنیکي کمېټه وټاکله؛ ترڅو د کمېټو د غړو له لوري وړاندې شوي وړاندیزونه او اصلاحات په سند کې شامل کړي او د یاد سند د نهایي کولو او راتلونکو اجراآتو لپاره لازم اقدامات ترسره شي.