د پنځو ولایتونو ۱۵ طبي ټکنالوجستانو ته د چیچک او ویروسي هیپاټایټس د لابراتواري تشخیص درې ورځنۍ روزنه ورکړل شوه

د عامې روغتیا وزارت د مرکزي لابراتوارونو آمریت له لوري د پنځو ولایتونو د حوزوي لابراتوارونو ۱۵ تنو طبي ټکنالوجستانو ته د چیچک او ويروسي هیپاټايټس د لابراتواري تشخيص (Training on Laboratory Diagnosis of Chickenpox and Viral Hepatitis) ترعنوان لاندې درې ورځنۍ روزنيزه دوره ترسره شوه

یاده روزنيزه دوره چې د روغتيا نړيوال سازمان په همکارۍ ترسره شوه، په اړه يې د عامې روغتیا وزارت د تشخیصه خدماتو رئیس، دوکتور محمد قاسم صاحبي وويل: دغه روزنیزه دوره د مسلکي او مجربو استادانو له لوري په عملي او نظري بڼه د طبي ټکنالوجستانو د ظرفیت لوړونې په موخه ترسره شوه؛ ترڅو یاد کارکوونکي وکولای شي،‌ زده کړي موضوعات په اړوندو کاري ځایونو کې پلي کړي او هم يې له خپلو همکارانو سره شريک کړي.

همداراز، د تشخیصه خدماتو رئیس زیاته کړه، چې په راتلونکي کې به نورو طبي ټګنالوجستانو ته هم ورته روزنیزې دورې په لاره واچول شي او له ګډونوالو يې غوښتنه وکړه، چې له دې فرصت څخه اغېزمنه ګټه واخلي.