د عامې روغتیا وزارت له لوري د تلاسیمیا نړیواله ورځ د یوې غونډې په ترڅ کې ونمانځل شوه
په همدې موخه جوړو شویو مراسمو کې د عامې روغتیا وزیر، ښاغلي ډاکټر قلندر عباد، د روغتیايي خدمتونو د وړاندې کولو مرستیال، ښاغلي مولوي عبدالولي حقاني او د ګڼو نورو ادارو یو شمېر رئیسانو او استازو ګډون کړی و.
د عامې روغتیا وزیر، ښاغلي ډاکتر قلندر عباد د تلاسیمیا ناروغۍ په اړه د بشپړو معلوماتو وړاندې کېدو سربېره د غونډې ګډونوالو ته وویل:( موږ په تېرودوو کلونو کې د شته امکاناتو په درلودو د وینې د کمښت ناروغانو ته د درملنې په برخه کې په کور دننه ګڼې اسانتیاوې برابرې کړي او اوس هم په دې برخه کې هڅې روانې دي.)
ښاغلي وزیر زیاته کړه، د عامې روغتیا رهبري هڅه کوي، چې د دوامداره وینې کمونکو ناروغانو د تشخیص لپاره د شته امکاناتو په لرلو او د خپلو کاري شریکانو په ګډه همکارۍ مجهز لابراتوارونه او د معیاري درملنې په موخه یې په مرکز کابل او د هېواد په زونونو او ولایتونو کې روغتیايي مراکز جوړ کړي.
د عامې روغتیا وزیر همداراز ګډونوالو ته په هېواد کې د بې کیفیته درملو د له منځه وړلو په برخه کې د دغه وزارت د هڅو په اړه معلومات ورکړل او ویې ویل، زموږ هڅه دا ده، چې په کور دننه ټولو هېوادوالو ته د باکیفیته درملو په لاسرسي د معیاري درملنې لپاره اسانتیاوې برابرې کړو؛ ترڅو د ناروغانو ستونزو ته لازمه رسېدنه وشي.
له بل لوري د یادې غونډې په دوام د عامې روغتیا وزارت د روغتیايي خدمتونو وړاندې کولو مرستیال، ښاغلي عبدالولي حقاني، د معالجوي طب عمومي رئیس احمد سیر پاڅون او د وینې مرکزي بانک رئیس، ډاکتر سیف الرحمن پشتون د دې ورځې څخه د نمانځنې پر اهمیت، ترسره شویو فعالیتونو او په دې ناروغۍ د اخته ناروغانو روغتیايي حالت ته د رسېدنې په اړه د غونډې کډونوالو ته معلومات وړاندې کړل.
