د عامې روغتیا وزارت د داخلي تفتیش رئیس د میدان وردګ د روغتیا ریاست څخه لیدنه وکړه
د عامې روغتیا وزارت د داخلي تفتیش رئیس، مولوي محمد سلیم حقاني او مل تخنیکي ټیم میدان وردګ ولایت ته د سفر په ترڅ کې د یاد ولایت د عامې روغتیا له رياست څخه ليدنه وکړه
په دې لیدنه کې چې د روغتیایي خدماتو ښه والي او شته ستونزو حل په اړه خبرې وشوې، د میدان وردګ ولایت عامې روغتیا رئیس حافظ سعيد الرحمن د یاد پلاوي هرکلی وکړ او ویې ویل: د عامې روغتیا وزارت مرکزي مسؤلینو دا ډول سفرونه د ستونزو حل او اسانتیاوو رامنځته کېدو لپاره مهم دي او زیاته یې کړه، د روغتیایي خدماتو پیاوړتیا لپاره به خپلو هڅو ته دوام ورکوي.
دغه راز، د عامې روغتیا وزارت د داخلي تفتیش رئیس د میدان وردګ ولایت د عامې روغتیا ریاست پر هلو ځلو خوښي څرګنده او د خدماتو لا ښه والي او اغېزمنتیا په موخه یې ورته لازمې سپارښتنې وکړې او ویې وویل، د روغتیایي خدماتو ښه والي په موخه به هر راز ستونزې په ګډه حلوي او هڅه کوي چې د میدان وردګ ولایت وضعیت ته په کتو روغتیا برخه کې د پام وړ بدلونونه راولي؛ څو خلکو ته لازمې اسانتیاوې رامنځته شي.
