تورخم ته د سترګو د ناروغیو درملنې ګرځنده روغتیايي ټیم ولېږل شو
د عامې روغتیا وزیر، ښاغلي مولوي نور جلال جلالي په ځانګړي هدایت تورخم ته د سترګو ناروغیو د درملنې یو ګرځنده روغتیايي ټیم چې پر مجهزو درملو او تجهیزاتو سمبال و، ولېږل شو؛ ترڅو بېرته راستنېدونکو هېوادوالو ته د سترګو اړوند ناروغیو درملنې برخه کې لازم روغتیايي خدمات وړاندې کړي.
ښاغلي وزیر، له یاد ټیم څخه وغوښتل، چې بېرته راستنېدونکو هېوادوالو ته د سترګو ناروغیو درملنې برخه کې غوره خدمات وړاندې کړي.
د یادونې وړ ده د بېرته را ستنېدونکو هېوادوالو لپاره په تورخم کې نږدې ۱۲ روغتیایي مراکز په خدماتو بوخت دي، همدارنګه کندهار، نیمروز او نورو فرضي کرښو ته څېرمه سیمو کې هم بېرته راستنېدونکو ته روغتیایي خدمات وړاندې کېږي.
