د ا.ا.ا د عامې روغتیا وزارت له لوري د مور په شیدو د تغذيې نړیوالې اوونۍ په مناسبت د عامه پوهاوي غونډه تر سره شوه
په همدې موخه جوړو شویو مراسمو کې د عامې روغتیا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني، د مالې وزارت اداري مرستیال ښاغلي مولوي دوست محمد مخلص، د عامې روغتیا وزارت یو شمېر مرکزي رئیسانو، روغتیا نړیوال سازامان، یونیسف او خوړو نړیوال پروګرام (WFP) استازو ګډون کړی و.
د عامې روغتیا وزارت د روغتیايي خدمتونو وړاندې کولو مرستیال ښاغلي مولوي عبدالولي حقاني د اسلام مبارک دین له نظره د مور د شیدو او بچي ته یې د ورکړې پر ارزښت هر اړخیزه وینا ترسره او ماشومانو ته یې د مور د شیدو په ورکولو ټینګار وکړ.
دغه راز، ښاغلي مرستیال د مور شیدې د ماشوم لپاره لومړنۍ غذا، واکسین او درمل وګڼل او زیاته یې کړه، چې د عامې روغتیا وزارت د مور د شیدو د ارزښت په اړه د عامه پوهاوي په موخه دوامداره هڅې کوي؛ تر څو په دغه برخه کې هېوادوالو ته اړین معلومات ورکړل شي.
